श्री दिगुख्यः गुथिया ग्वसालय् झीगु समुदाय दुने तःधंगु योगदान बियाच्वनादी सा नं चर्चा मदुगु वा ओझेलय् लानाच्वंपिं आदरणीय व्यक्तित्वपिन्त म्हसीकेगु ल्याखं न्ह्याकागु "Hidden Jewels" सुलाच्वम रत्न मासिक ज्याझ्वः सिरिजया थुगु विशेष भागय् झीसं असनया खापामदुदुवाः 'क' कवःया हनेबहःम्ह दुजः नापं नेपाःया स्थापित फेशन डियाजाइनर व उद्यमी बेनु शोभा तुलाधरज्यूयात सःताः वैकयागु जीवनया उतार-चढाव, लँपु व अनुभवया बारे सहलह यायेगु ग्वसाः ग्वयागु दु।

विक्रम सम्बत् २०२९ साल निसें सिलाई (Tailoring) ख्यलय् न्ह्यच्वयाः वि.सं. २०४३ सालय् थःगु हे "Lady Namuna (Fashion Designer, Professional Tailor & Training)" कम्पनी पलिस्था यानाः थःगु व्यवसायिक पलाः न्ह्याकादीम्ह बेनु शोवा तुलाधरज्यू छम्ह अनुकरणीय व्यक्तित्व खः। ५० स्वयां अप्वः नेपाली संकिपा (Films), टेलिचलचित्र, प्याखं (Dramas) व थीथी प्रतिष्ठित ज्याझ्वःया जजपिनिगु निंतिं ड्रेस डिजाइन यानादीधुंकूम्ह वय्‌कः नेवाः/नेपाःया पारम्परिक सांस्कृतिक नसा-वसः (Cultural Dresses) व आधुनिक फेशन निम्हेसिगु हे विशेषज्ञ खः।

९०% स्वयां अप्वः मिसा कर्मचारीतय्त रोजगारी बियाः व फुक्कं नेपाली मनूतय्त जक आवद्ध यानाः महिला सबलीकरण व स्थानीय उद्यमशीलताय् वय्‌कः पाखें जूगु योगदान तसकं च्वछायेबहः दु। थीथी राष्ट्रिय व अन्तर्राष्ट्रिय सिरपाः (Awards) व हनापौ पाखें सम्मानित वय्‌कःया थ्व ४ दशाय् स्वयां अप्वःया लँपु व व्यापारिक अनुभवं झीगु २६ कवःया उद्यमी मिसा, युवा व सकल गुथियारपिन्त न्हूगु प्रेरणा व ऊर्जा बीगु विश्वास कयागु दु।